Ashirye nake in sauka daga karagar mulki matukar hakan zai samar da zaman lafiya – Matawalle

Gwamnan jihar Zamfara, Bello Matawalle, ya ce, a shirye yake da ya ajiye mukamin sa na gwamna matukar hakan zai sa a samu zaman lafiya a fadin jihar.

A cewar sa in har hakan ne mafita zai sa a samu saukin hare-haren ‘yan bindiga da masu garkuwa da mutane to a shirye yak e ya sauka daga karagar mulkin jihar.

Matawalle, ya bayyana hakan ne ta cikin shirin siyasa a yau, na tashar talabijin din Channels wanda ya mai da hankali kan harkokin tsaro da ya shafi jihar musamman ma sanya dokar hana shawagin jiragen sama a sararin samaniyar jihar da shugaban kasa Muhammadu Buhari yayi a baya bayan nan.

‘‘Matukar sauka ta daga mulki za ta sa a samu zaman lafiya, tare da kare rayuka da dukiyoyin al’ummar jiha ta, ba tare da zubar da jinin su ba, a shirye nake da in sauka ko yanzu’’ a cewar Matawalle.

Gwamna Matawalle, ya kuma kara da cewa gwamnatin sa na nan akan bakarta na ci gaba da tattunawar sulhu da ‘yan bindiga don ganin an kawo karshen matsalolin tsaro da ke addabar jihar.