Ashleigh Bartey tayi ritaya daga fagen Tennis

‘Yar wasa lamba daya ta duniya, Ashleigh Bartey ta ce tayi ritaya daga buga wasan kwallon Tennis.

Bartey ta bayyana haka ne kwatsam ba tare da tsammani ba, a ranar Laraba 23 ga watan Maris din 2022 a wani faifan Bidiyo da ta fitar ta na bankwana da magoya bayanta.

Cikin alhini gami da zubar da hawaye tace ”Abu ne mai wahala na iya cewa nayi ritaya, sai dai ina matukar farin ciki na kuma shirya da hakan.”

‘Yar wasan mai shekaru 25, ta bayyana aniyarta ta ajiye raket din nata makonni kadan bayan da ta lashe gasar Australian Open, kuma watanni shida bayan da tayi nasara a gasar Wimbledon ta shekarar da ta gabata ta 2021.

Zakarar gasar Grand Slam har karo uku ta kasar Australia, ta dai lashe kyautar lamba daya ta duniya a wasan Tennis a ranar 24 ga watan Janairun shekarar 2014.