ASUU ba ta sanar da mu za ta shiga yajin aiki ba – Ministan Ilimi

Gwamnatin tarayya ta yi zargin cewa ƙungiyar malaman jami’o’i ta ƙasa ASUU ba ta sanar da ita matakinta na tafiya yajin aiki ba.

Ministan Ilimi Adamu Adamu ne ya bayyana hakan a wata sanarwa da daraktan yaɗa labaran ma’aikatar Bem Gboon ya fitar.

Sanarwar ta yi zargin cewa ma’aikatar ilimi ta ƙasa ta samu labarin tafiya yajin aikin wata guda na gargaɗi da ƙungiyar ASUU ta yi kamar yadda kowanne ɗan Najeriya ya samu labari.

Adamu Adamu ya kuma ce, ƙofofin ma’aikatar ilimi a buɗe suke domin tattaunawa da ƙungiyar, sai dai kuma babu wata sanarwa da ƙungiyar ta bata a hukumance.