Ba ni da niyyar barin Jam’iyyar NNPP- Sanata Kwankwaso

Ɗan takarar shugaban ƙasa a zaben da ya gabata na shekarar 2023 karkashin jam’iyyar NNPP, Sanata Rabiu Musa Kwankwaso, ya ce ba shi da niyyar barin jam’iyyar, duk da cewa a shirye yake ya tattauna da sauran ‘yan siyasa kafin zaɓen 2027.

Sanata Rabi’u Musa Kwankwaso, ya bayyana hakan ne a taron kwamitin zartaswa na ƙasa da aka gudanar a Abuja, inda ya bayyana NNPP a matsayin “amaryar siyasar Najeriya” mai cike da manufofin ci gaba da kula da al’umma.

A nasa bangaren, sakataren jam’iyyar na ƙasa, Dipo Olayoku, ya ce NNPP na da shiri sosai domin tunkarar zaɓen gwamnan jihar Anambra wanda za a gudanar a watan  Nuwamba 2025 da kuma zaɓen kananan hukumomin Abuja a Fabrairu 2026.

Jam’iyyar ta kuma yi kira ga ‘yan Najeriya da su yi rijista da hukumar INEC domin samun katin zabe, tana mai jaddada cewa kujerar ku ita ce muryarku.