Babban hafsan sojin kasa ya kaddamar da shirin bunkasa dakarun Operation Hadin Kai

Babban hafsan sojin kasa na Najeriya, Laftanar Janar Faruok Yahaya ya kaddamar da wani shiri na bunkasa walwalar dakarun Operation Hadin Kai don kara kyautata harkokin tsaro a kasar nan.

Wannan na cikin wata sanarwa da daraktan yada labaran rundunar Birgediya Janar Onyeama Nwachukwu ya fitar yau.

Sanarwar ta bukaci jami’an da su yi amfani da damar wajen kyautata alaka da sauran sojoji don tabbatar da tsaro da zaman lafiya a kasar nan.

Ta cikin sanarwar, Janar Farouk Yahaya ya ce shirin zai baiwa jami’an damar ziyartar iyalansu da saukaka duk wata zirga-zirga a lokacin gudanar da aikinsu.

An gudanar da bikin kaddamar da shirin ne a jiya a sansanin sojojin sama da ke Maiduguri a Jihar Borno.