Bayan dakatar da Muhyi Ganduje ya naɗa sabon shugaban hukumar Anti kwarafshin

Gwamnan Kano Dr. Abdullahi Umar Ganduje ya naɗa Barrista Mahmud Balarabe a matsayin mai riƙon mukamin shugaban hukumar karɓar ƙorafe-ƙorafe da yaƙi da cin hanci da rashawa ta jihar Kano.

Hakan na cikin wata sanarwa ce mai ɗauke da sa hannun sakataren yaɗa labarai na gwamnan Kano Abba Anwar.

A cewar sanarwar naɗin Barrista Mahmud Balarabe ya fara aiki ne nan take.

Kafin naɗin nasa darakta ne mai kula da harkokin shigar da kara a ma’aikatar shari’a ta jihar Kano.

A baya-bayan nan ne majalisar dokokin jihar Kano ta dakatar da shugaban hukumar ta Anti Corruption ta jihar Kano, Barrista Muhyi Magaji Rimingado.