Tsaro: Wasu ‘yan bindiga sun kashe mutane 8 a Kaduna

Gwamnatin jihar Kaduna ta ce wasu da ake zargin ‘yan fashi ne sun kashe mutane takwas tare da jikkata wasu hudu a wasu hare-hare daban-daban a kananan hukumomin Chikun, Giwa da Kajuru da ke jihar.

Kwamishinan tsaron da harkokin cikin gida Samuel Aruwan ne ya tabbatar da harin ta cikin wata sanarwa da ya fitar.

Harin na zuwa ne yayin da ‘yan fashin suka harbi wata mota lamarin da ya haifar da kifewarta nan take.

Sanarwar ta kuma ce, ‘yan fashin sun kai wani hari kan mutane a Iburu da ke cikin Karamar Hukumar Kajuru kuma sun kashe mutum daya, yayin da kuma suka mamaye kauyen Hayin Kanwa da ke gundumar Fatika, a karamar hukumar Giwa suka kashe wani dan kasuwa bayan ya bijirewa yunkurin sace shi da suka yi.