Buhari ya ce nan ba da dadewaba za’a komawa makarantu

Gwamnatin tarayya ta ce da zarar an dage dokar hana zirga-zirga tsakanin jihohi a kasar nan zata fara shirye-shirye kan yadda za’a koma makarantu a kasar nan.

Karamin ministan Ilimi Emeka Nwajiuba ne ya bayyana hakan a yayin da kwamitin shugaban kasa kan yaki da cutar Corona ke gudanar da taron manema labarai da ya saba a kullum, yana mai cewa, gwamnatin tarayya na bin matakan da suka dace ne, don bude makarantu a kasar nan gudun kar a yi gaggawa, hakan kuma ya jefa rayuwar al’ummar kasar nan cikin hadari.

Emeka ya kuma kara da cewa, har yanzu gwamnatin tarayya bata tsayar da tartibib lokacin da za’a koma makarantu ba, a don haka jama’a su yi watsi da duk waani rahoton komawa makaranta da ke yawo a kafafen sada zumunta na zamani.

Idan dai za’a iya tunawa, tun a watan Maris din da ya gabata ne gwamnatin tarayya ta rufe dukannin makarantun kasar nan, sakamakon yadda cutar Covid-19 ke kara karuwa a kasar nan.