Buhari ya mika sakon ta’aziyya ga iyalan Manjo Janar Sama’ila

Shugaban kasa Muhammadu Buhari ya mika sakon ta’aziyyar sa ga iyalan Manjo Janar Sama’ila Ilyasu bisa rasuwar sa.

Wannan na cikin wata sanarwa da mataimaki na musamman ga shugaban kasa kan harkokin yada labarai Femi Adesina.

Sanarwar na bayyana cewa marigayin soja ne da ya sadaukar da rayuwar sa wajen kare kima da mutuncin kasar nan da kuma tabbatar da zaman lafiya.

Shugaba Buhari ya kuma ce Marigayi Manjo Sama’ila mutum ne na gari, mai son ci gaban sakar nan da kuma iya shugabanci, kasancewar ya rike mukamin shugaban tawagar kwantar da tarzoma a kasashen Lebanon da jamhuriyar dimokradiyyar Congo.

Haka kuma Shugaban kasa ya kuma yi addu’ar ubangiji ya gafarta masa, ya kuma baiwa iyalan sa hakurin rashin sa.