Ciwon kunne ya janyo tsaiko a shari’ar Ɗan saruaniya

Kotun majistret mai lamba 58 ƙarkashin mai Shari’a Aminu Gabari ta yi umarnin a tsare injiniya Mu’azu Magaji Ɗan Saruaniya a asibitin Ƴan sanda.

Tun da fari dai an gurfanar da Ɗan saruaniya ne bisa zargin ɓata suna inda aka yi zargin ya saki baki a kan gwamnan Ƙano Dakta Abdullahi Umar Ganduje.

A zaman kotun na ranar Juma’a lauyan Ɗan Sarauniya ya yi suka a kan buƙatur masu gabatar da ƙara waɗanda suka roƙi a karantowa Ɗan Sarauniyar tuhumar da ake yi masa sakamakon baya ji sosai biyo bayan haɗari da yayi.

Yayin da yake ƙwarya-ƙwaryar hukunci mai shari’a Aminu Gabari ya ayyana cewar tabbas wanda yake da matsalar kunne ba za a karanta masa tuhuma ba tunda ba zai iya jin abin da aka karanta ba.

Sai dai kotun ta yi umarni a tsare shi a asibitin ƴan sanda zuwa ranar Litinin wanda ake sa ran ko kunnen na sa zai warke kamar yanda wakilin Freedom Radio Yusuf Nadabo Ismail ya ruwaito.