CoronaWave2: El-rufa’i ya umarci ma’aikata su zauna a gida

Gwamnatin jihar Kaduna ta umarci ma’aikata da ke ƙasa da matakin aiki na 14 su yi aiki daga gida.

Hakan na cikin sanarwar da gwamnatin jihar ta fitar a shafin ta na Facebook mai ɗauke da sa hannun mai bai wa gwamna shawara kan yaɗa labarai Muyiwa Adekeye.

Sanarwar ta ce, ma’aikatan za su fara aiki daga gida ne daga ranar Litinin 21 ga watan Disamba da mu ke ciki, domin daƙile yaɗuwar cutar Koronabairos.

A farkon makon nan ne dai gwamna El-rufa’i ya sanar da rufe makarantun jihar yayin da ake samun yawaitar masu kamuwa da Covid-19 a jihar.