Covid-19: Babu hada sahun Sallah a Jigawa

Gwamnatin jihar Jigawa ta ce daga ranar Jumu’a ta dakatar da jama’a daga hada sahun sallah domin kaucewa cakuduwa a tsakanin jama’a.

Gwamnan jihar Jigawa, Alhaji Muhammad Badaru Abubakar ne ya bayyana hakan ga manema labarai yau a birnin Dutsen jihar Jigawa.

Wakilin mu Aminu Umar Shuwajo ya rawaito mana cewa gwamnan ya ce daga yanzu gwamnatin jihar Jigawa ta dakatar da duk wani taron daurin aure, ko suna da duk wani taron jama’a a jihar.

Wannan mataki da gwamnatin jihar Jigawa ta dauka na zuwa ne kasa da awanni da dokar hana fita da zaman kulle wadda makociyar ta wato jihar Kano ta sanya kuma za ta fara aiki a daren Alhamis.

Har izuwa yanzu dai ba a samu bullar cutar ta Corona a jihar Jigawan ba.