Da ɗumi-ɗumi: Ganduje ya sauke Baba Impossible

Gwamnan ya kuma maye gurbinsa da DaktaNazifi Bichi.

An sauke Baba Impossible ɗin ne biyo bayan halin rashin ɗa’a da ya nuna da kuma furta wasu kalamai a matsayinsa na ma’aikacin gwamnati mai riƙe da muƙami.

Kwamishinan yaɗa labarai Malam Muhammad Garba ya sanar da korar Baba Impossible a cikin wata sanarwa da ya fitar yau Asabar, 31 ga watn Disamba.

Sanarwar ta ce, an samu Baba Impossible da laifin gudanar da al’amuran ofishinsa a matsayin sana’a na ƙashin kansa, har ma ya kan rage kwanakin zuwa aiki ga ma’aikatansa.

Cikin ranakun da ya ragewa ma’aikatansa sun hada da ranakun Laraba da Juma’a.

Kwamishinan ya kara da cewa baya ga gudanar da aiki ba tare da tuntubar juna ba, Baba Impossible baya biyayya ga gwamnati.

Ya kuma kara da cewa tuni Gwamna Abdullahi Umar Ganduje ya aika wa majalisar dokokin jihar sunan wanda aka zaɓa da zai maye gurbinsu wato Dakta Nazifi Ishaq Bichi na Jami’ar Bayero Kano.