Dalilan Kotu na bayyana Gawuna a matsayin wanda ya lashe zaɓe

Kotun sauraron ƙarar zaɓen gwamnan Kano, ta bayyana ɗan takarar jam’iyyar APC, Alhaji Nasiru Yusuf Gawuna, a matsayin wanda ya lashe zaɓen da aka gudanar ranar 18 ga Maris ɗin bana.

Kotun ta bayyana hukunci ne yau Laraba ta manhajar sadarwa ta Zoom.

BBC ta ruwaito cewa, Mai shari’a Oluyemi Akintan-Osadebay, wadda ita ce shugabar kotun kuma jagoranci alƙalan kotun guda uku, ta ce, ta yanke hukunci ne bisa hujjar cewa an yi aringizon ƙuri’u 165,633, waɗanda aka gano ba su da sitamfi da kuma kwanan wata a ƙuri’un da Abba Kabir na NNPP ya samu.

Haka kuma ta ruwaito cewa, Tun farko a watan Maris ɗin 2023, hukumar zaɓen ta ce ɗan takarar NNPP, Abba Kabir Yusuf ya ci zaɓen ne da ratar ƙuri’a 128,900.

Abba Kabir Yusuf, in ji INEC ya samu ƙuri’u mafi rinjaye da suka kai 1,019,602, inda Nasiru Yusuf Gawuna da ke biye da shi, ya samu ƙuri’a 890,705.

Alƙalan kotun sun umarci hukumar zaɓe ta INEC ta janye shaidar cin zaɓen da ta bai wa Abba Kabir Yusuf, tare da gabatar da ita ga Nasiru Yusuf Gawuna.

Jam’iyyar APC ce dai ta shigar da ƙara a gaban kotun ta na mai ƙalubalantar nasarar da Injiniya Abba Kabir Yusuf, ɗin ya samu.