Dokar bai wa mata damar samun gurbi a majalisun kasar nan za ta tsallake karatu na biyu

Kudirin dokar da zata tilastawa kowacce jiha ta ware kujera daya ga mata a matsayin ‘yar majalisar dattijai, za ta samu karatu na biyu nan ba da jimawa ba a zauren majalisar wakilai.

Yar majalisa Taiwo Oluga, wadda ita ce shugabar Kwamitin kula da al’amuran mata a majalisar, ta bayyana hakan lokacin da ta ke karbar bakuncin Kungiyar da ke rajin samar da daidaiton jinsi a Abuja.

Yar majalisar ta ce kudirin wani shiri ne na kwamitin kuma na daga cikin bangare na kokarin karawa mata wakilci a cikin gwamnati.

Taiwo Oluga ta kara da cewa kunshin dokar ta bukaci a samu akalla sanata daga kowace jiha, mafi karanci ya zama biyu cikin uku.

A cewar ta matukar aka sanya mata a cikin al’amuran majalisa to kuwa za su bada gudunmawa wajen ci gaban al’amuran kasa kamar tsaro, kiwon lafiya da kuma rage yawan yara da ba sa zuwa makaranta.