Katsina ta karbi kason rigakafin corona

A daren jiya Laraba ne jihar Katsina ta karbi kashin farko na rigakafin cutar COVID-19.

Allurar rigakafin wadda ta haura sama da dubu dari da hamsin, ta isa Filin jirgin saman Umaru Musa Yar’ardua a daren.

Sakataren zartarwa na hukumar kula da lafiya a matakin farko na jihar, Dr Shamsudeen Yahaya na daga cikin jami’an da suka karbi allurar rigakafin kamar yadda ya tabbatarwa manema labarai.

A cewarsa allurar rigakafin ta isa jihar da misalin karfe 9 da minti hamsin da biyu na dare, inda ya tabbatar da cewa za a fara yiwa gwamnan jihar Aminu Bello Masari da jami’an lafiya allurar rigakafin.