DSS: Muna neman Sunday Igboho ruwa a jallo

Hukumar tsaron sirri ta DSS ta bayyana jagoran tsagerun yarbawa Sunday Adeyemo wanda aka fi sani da Sunday Igboho a matsayin wanda ta ke nema ruwa a jallo.

Hukumar ta DSS ta bayyana hakan ne yayin wani taron manema labarai da ta gudanar a jiya alhamis.

Ta kuma ce jami’anta ne suka kai sumame gidan ɗan ta’addar da ke birnin Badun, wanda kuma tuni suka kashe biyu daga cikin jama’arsa, tare da kama wasu da dama.

Yayin taron manema labaran a shalkwatar hukumar ta DSS a Abuja, mai magana da yawun hukumar, Peter Afunanya, ya ce, duk wanda ya san inda Sunday Igboho ya ke, ya gaggauta sanar da hukumar, akwai tukuici mai yawa da za a bashi.

A cewar mai magana da yawun hukumar ta DSS, yayin sumamen, jami’an hukumar sun kama tarin makamai da kayan tsubbu a gidan jagoran tsagerun da ke ikirarin neman kafa ƴan tacciyar ƙasar Oduduwa.