Farashin Fetur na iya kaiwa Naira 2,000 idan rikicin Gabas ta Tsakiya ya ci gaba- PETROAN

Kungiyar masu gidajen sayar da mai ta kasa PETROAN, ta yi gargadin cewa farashin Man  fetur na iya kaiwa kusan Naira 2,000 a kan kowace lita a nan gaba kadan , yayin da dizal zai iya tashi zuwa Naira 3,000, idan rikicin da ke faruwa a Gabas ta Tsakiya ya ci gaba.

Shugaban kungiyar na kasa, Billy Gillis-Harry, ne ya bayyana hakan yayin da yake gabatar da jawabi a yayin wani taro a Jami’ar Ignatius Ajuru da ke birbin Fatakwal.

A cewar sa, tashin farashin mai a duniya da rikicin da ke kara tsananta tsakanin kasashen Israel, Iran, da kuma Amurka na iya jefa kasuwar makamashi cikin rudani, lamarin da zai iya janyo karin tsadar mai a kasar nan da sauran kasashen duniya.