Fursunoni 837 ne suka tsere a gidan gyaran hali na Oyo – NCS

Hukumar kula da gidaje gyaran hali ta ƙasar nan ta ce fursunoni 837 da ke jiran shari’a sun tsere Abolongo lokacin da wasu ƴan bindiga suka kai hari gidan.

Jami’in hulda da jama’a na hukumar Olanrewaju Anjorin, ne ya bayyana haka cikin wata sanarwa da ya fitar a ranar Asabar a Ibadan.

Anjorin ya ce, dukkanin fursunoni 837 da ke jiran shari’a a gidan sun tsare kuma maharan sun lalata dakunan da masu laifin ke ciki.

Sai dai ya ce, an samu nasarar kamo jimillar fursunoni 262 yayin da ake ci gaba da laluben 575.

Rahotanni sun tabbatar da cewa wasu ƴan bindiga sun kai wa gidan gyaran halin farmaki a ranar Juma’a da misalin karfe 9 da minti 30 na dare bayan da suka yi amfani da muggan makamai wajen shiga gidan.