Ganduje ya ayyana gobe Alhamis a matsayin hutun shekarar musulunci

Gwamnatin jihar Kano ta ayyana gobe Alhamis a matsayin ranar hutu ga ma’aikatan jihar domin murnar zagayowar sabuwar shekarar musulunci.

Gwamnan Kano Dakta Abdullahi Umar Ganduje ne ya bayyana hakan ta cikin wata sanarwar da kwamishinan yada labarai na jihar kwamared Muhammad Garba ya sanyawa hannu.

Sanarwar ta bukaci al’ummar musulmi da suyi amfani da ranar wajen gudanar da addu’o’i na musamman don samun zaman lafiya da ci gaban kasa.

Sanarwar ta yi fatan farfadowar tattalin arzikin kasar nan wadda ta samu koma baya sakamakon cutar corona.