Ganduje ya sanya hannu kan dokar ilimi kyauta kuma dole a Kano

Gwamnan Kano Dr. Abdullahi Umar Ganduje ya sanya hannu kan dokar ilimi kyauta kuma dole a jihar.

Gwamna Ganduje ya sanya hannun ne a zaman majalisar zartarwar jihar na ranar Laraba.

Dokar na nufin gwamnatin zata hukunta iyayen da ba su sanya ƴaƴansu a makaranta ba.

A yayin zaman majalisar gwamnan ya gabatar da shaidar kammala karatu ga ɗalibai 22 da gwamnatin ya ƙarasa biya wa kuɗin makaranta.

Ɗaliban sun yi karatu a American University Yola, har ma biyu daga cika sun fito da sakamakon matakin farko wato First Class.

Haka ma Ganduje ya rantsar da sabon babban sakatare guda ɗaya Sani Abdullahi Ƙofar Mata.

Sannan ya rantsar da Bala Lawan Gezawa a matsayin kwamishina a hukumar zaɓe ta jiha.