Gwamnatin jihar Bauchi ta amince da ritayar mataimakinta

Gwamnatin jihar Bauchi ta amince da ritayar da mataimakin gwamnan jihar injiniya Nuhu Gidado ya yi inda kuma ta yi masa fatan alheri a rayuwar sa ta gaba.

Wannan na kunshe cikin wata sanarwa da mashawarcin na musamman kan kafafen yada labarai ga gwamnan jihar ta Bauchi Ali M Ali ya fitar da safiyar yau.

Sanarwar ta ruwaito Gwamman jihar ta Bauchi Alhaji Muhammad Abdullahi Abubakar na bayyana tsohon mataimakin gwamnan a matsayin wanda ya sauke nauyin da aka dora masa, a don haka ya cancanci dukkan yabo daga gwamnatin jihar da ma al’ummar jihar baki daya.

A jiya ne dai mataimakin gwamnan sanar da murabus din nasa cikin wata wasika da ya fitar mai dauke da kwanan watan 16 ga watan Mayun da muke ciki, bisa wadansu al’amura da suka sha kan sa da ya ga cewar ya kamata yayi murabus daga kan mukamin nasa.

Sai dai wani makusancin gwamnan ya shaida manema labarai cewar rashin fahimtar juna ce tsakanin sa da gwamnan ta sanya shi yin murabus din.