Gwamnatin Kano ta ɗage aikin tsaftar Muhalli

Gwamnatin jihar Kano, ta dakatar da aikin duben tsaftar muhalli na watan nan da muke ciki na Afrilu domin bai wa daliban da za su rubuta jarrabawar shiga makarantun gaba da Sakandare ta JAMB damar isa cibiyoyin jarrabawar a kan lokaci.

Kwamishinan muhalli da kula da sauyin yanayi Dakta Dahir Muhammad Hashim, ne ya sanar da hakan ta cikin wata sanarwar da daraktan wayar da kan jama’a na ma’aikatar Isma’il Garba Gwammaja ya fitar yau Alhamis.

Kwamishinan ta cikin sanarwar ya kuma bayyana cewa, dakatarwar ta wucin gadi ce watau ta iya wannan watan kaɗai, kuma za a ci gaba da aikin tsaftar mahalli a wata mai kamawa na Mayu.

Haka kuma, ya yi kira ga mazauna Kano da su bai wa hukuma hadin kai da fahimtar dalilin da ya sa aka yanke wannan hukunci musamman na ganin cewa ayyukan tsaftar muhalli ba su ci karo da wasu muhimman abubuwan da ke faruwa a jihar ba.