Gwamnatin Kano ta ci gaba yin rusau a Massallacin Idi

A daren jiya ne Gwamnatin jihar Kano ta ci gaba da rushe gine-ginen da ke cikin filin Masallacin Idi na Ƙofar Mata.

Motocin Rusau huɗu ne suka ci gaba da rushe gine-ginen Shaguna ɗari da aka yi a cikin filin idin.

Da ya ke yin ƙarin bayani a kai, shugaban hukumar tsara birane ta Kano Arch. Ibrahim Yakubu ya shaida wa Freedom Radio cewa abin takaici ne ace an gine filin Babban Masallacin Idi na garin da ke alfahari da Musulunci.

Ya kuma yi kira ga waɗanda ke da kayayyaki a wuraren da aka sanya wa jan fenti da su gaggauta kwashewa domin ci gaba da wannan rushe-rushen ya zama dole ba gudu ba ja da baya a cewarsa.

Wanda ya ce ‘ba gudu, ba ja da baya, sai gwamnatin ta tabbatar ta dawo da Kano dai-dai da tsarin da aka zanata a kai’.

Rahoton: Bashir Sharfadi