Gwamnatin Kano ta musanta shigo da Corona ta Filin Jirgin saman Malam Aminu Kano

Gwamnatin Jihar Kano ta musanta rade-radin da aka wayi gari da shi yau cewa wai an samu wani mai dauke da kwayar cutar Corona a filin Jirgin saman Malam Aminu Kano.

Mataimakin shugaban kwamitin yaki da kwayar cutar Corona na Jihar Kano Farfesa Abdulrazak Habib ne ya sanar da hakan yayain zantawa da Freedom Radio ta wayar tarho a yau.

Wata majaiya ta shaidawa Freedom Radio cewa wani matashi ne mai shekaru 17 ya fara amai bayan sauka daga Jirgi da ya taso daga Jihar Lagos da safiyar yau, wanda kuma nan take aka killace shi.

Farfesa Abdulrazak Habib ya tabbatar da cewa duk wasu gwaje-gwajen lafiya da aka gudanar a kan matashin sun nuna cewa baya dauke da cutar, kuma an sallame shi.

Sai dai ya ce za su ci gaba da bibiyarsa, bayan da suka tattara bayanai a kansa.