Gwamnatin tarayya ta soke karbar haraji a kan hanya

Gwamnatin tarayya ta haramta karɓar haraji kuɗi hannu tare da hana tsayar da motoci a hanya domin tilasta biyan haraji, a wani ɓangare na sabbin ƙa’idojin aiwatar da dokokin haraji a ƙasar 

Shugaban Hukumar Haɗin Gwiwar Kuɗaɗen Shiga Olusegun Adesokan ne ya bayyana hakan ranar Talata a  birnin tarayya Abuja, yayin rattaba hannu kan ƙa’idoji da jagororin aiwatar da dokokin haraji.

Adesokan ya ce sabon tsarin an tsara shi ne domin kawo ƙarshen hanyoyin karɓar haraji marasa tsari, musamman a matakan jihohi da ƙananan hukumomi. 

Ya ce dokokin sun haramta duk wani nau’in karɓar haraji da kuɗi hannu tare da hana tsayar da motoci a hanya domin karɓar haraji.

Ya ƙara da cewa sabbin ƙa’idojin sun ware ƙananan sana’o’i da ke samun kuɗin shiga Naira miliyan 12 ko ƙasa da haka a shekara daga biyan haraji, yayin da sauran sana’o’in da ba sa cikin wannan tsarin za su biya harajin kaso ɗaya cikin ɗari na yawan kuɗin shigar su.

Ministan Kuɗi Wale Edun ya ce rattaba hannun kan ƙa’idojin na nuna fara aiwatar da gyaran tsarin haraji da majalisa ta amince da su a shekarun 2025 da 2026, yana mai cewa manufar gyaran ita ce faɗaɗa tushen haraji tare da kare ƙananan sana’o’i da tabbatar da gaskiya da daidaito a tsarin haraji.