Har yanzu muna nan a kan tuhumar da mu ke yiwa Sheikh Abduljabbar – Malaman Kano

Zauren haɗin kan malamai da ƙungiyoyi na jihar Kano ya ce, har yanzu malamai suna nan a kan tuhumar da suke yiwa Sheikh Abduljabbar Kabara.

Hakan dai na cikin wata sanarwa ta saƙon murya da Babban Sakataren zauren Dr. Sa’id Ahmad Dukawa ya aike wa Freedom Radio.

Dukawa ya ce, “Sakamakon takunkumin da kotu ta ƙaƙabawa Abduljabbar kuma ba ta ɗage shi ba, hukumomi sun nusashshe mu cewa, zaman tuhumar da aka shirya ranar Lahadi ba zai yiwu ba”.

Ya ci gaba da cewa, “Amma Malamai suna nan a kan bakansu na tuhumar sa da zarar hukumomi sun bada izni”.

A ƙarshe zauren ya yi kira ga al’umma da su ci gaba da haƙuri, tare da bin umarni har zuwa lokacin da Allah zai ba da damar gabatar da zaman tuhumar.

Idan zaku iya tunawa, Zauren haɗin kan malamai da ƙungiyoyi na jihar Kano shi ne ya shigar da ƙorafi kan Malam Kabara a wajen Gwamnatin Kano.