Harin da aka kai wa gwamna Zulum ya yi sanadiyyar mutuwar sojoji 4 da ‘yan sanda 10

Rundunar sojin kasar nan ta sanar da cewa jami’anta hudu da kuma ‘yan sanda goma aka kashe yayin kwanton bauna da ‘yan kungiyar Boko Haram suka yi tawagar gwamnan Jihar Borno Farfesa Babagana Umara Zulum a ranar juma’ar da ta gabata.

Wata sanarwa da babban jami’in yada labaran rundunar tsaro ta kasa Manjo Janar John Enenche ya fitar, ta ce sun gano gawarwakin jami’an na su a daji ne sa’o’i 24 bayan harin da aka kaiwa jerin gwanon motocin gwamnan a kauyen Barwati a kan hanyarsu ta zuwa garin Baga.

Sanarwar ta kara da cewa tuni suka aike da kararrun jami’ansu masu gano inda aka binne nakiyoyi da sauran abubuwa masu fashewa domin kawar da su.