Hukumar Civil Defence ta tura jami’ai 1750 don ba da tsaro a lokacin bikin sallah a Kano

Hukumar tsaro ta civil defence NSCDC ta ce ta tura da jami’anta 1750 yayin bikin sallah a fadin jihar Kano.

Hakan na kunshe ne cikin wata sanarwa da mai magana da yawun hukumar anan Kano ASC Ibrahim Abdullahi ya fitar jiya.

Sanarwar ta ce za a tura da jami’an ne zuwa filayen idi da kuma wuraren shakatawa a dukkannin kananan hukumomin jihar arba’in da hudu.

Sanarwar ta kuma bukaci al’ummar jihar Kano da su bai wa jami’an hukumar hadin kai a yayin bukukuwan sallah.