Hukumar NiMet ta fitar da sabon hasashen yanayin da za a fuskanta

Hukumar kula da harkokin yanayi ta Najeriya NiMet, ta yi hasashen cewa za a samu ruwan sama hade da tsawa a sassa daban-daban na kasar daga yau  Talata zuwa Alhamis mai zuwa.

Hasashen wanda hukumar ta fitar a baya bayan nan a birnin tarayya Abuja,  ya ce akwai yiwuwar  cewa za a fuskanci hadari hade da walkiya da tsawa a jihohin Katsina da Kano a yau Talata.

Rahoton ya kuma bayyana cewa, akwai yiwuwar samun hadari da tsawa mai karfi a jihohin Taraba da Adamawa da kuma zafin rana, yayin da  yankin Arewa ta Tsakiya, ake sa ran sararin samaniya za ta kasance da hadari kadan tare da walkiya da tsawa a Nasarawa da Kogi da Kwara, sai Benue da kuma birnin tarayya Abuja.

Hukumar ta Nimet , ta kara da cewa a yankin Kudu kuwa, hasashen ya nuna za a samu saukar ruwa, sannan tsawa ta biyo baya a jihohin Akwa Ibom da Cross River, sai Rivers da kuma Bayelsa.