Hukumar NiMet ta fitar da sabon rahoton hasashen yanayi

Hukumar kula da yanayi ta Najeriya NiMet ta yi hasashen samun hazo a wasu jihohin Arewacin Najeriya daga  yau Litinin zuwa Laraba.

Hakan na kunshe a  cikin sanarwar da Hukumar NiMet ta fitar a Daren jiya Lahadi.

Sanarwar ta nuna cewa a ranar Litinin ana sa ran hazo a sassan Jihohin Kebbi da Kano, inda nisan gani zai ragu zuwa tsakanin kilomita biyu zuwa biyar, yayin da sauran jihohin Arewa su ma za su fuskanci hazo.

A ranar Talata kuma ana sa ran hazo mai sauki a wasu sassan Kano da Kebbi, yayin da sauran jihohin Arewa za su ci gaba da kasancewa cikin hazo mai ƙura.

Hukumar ta ce a ranar Laraba dukkan jihohin Arewa za su ci gaba da kasancewa cikin hazo mai ƙura, tare da shawartar al’umma musamman masu matsalar numfashi su dauki matakan kariya.