Iftila’I: Mutane biyar sun mutu a Kano yayin hakar kasa

Hukumar kashe gobara ta jihar kano, ta tabbatar da mutuwar wasu Matasa biyar da suke tsaka da diban kasa domin bayar da gudunmawa ga abokinsu da ke shirin yin aure a wani rami dake Kauyen ‘yan Lami a karamar Hukumar Bichi.

Sanarwar hakan ta biyo ne ta bakin Jami’in hulda da jama’a na hukumar da ke nan kano SFS Saminu Yusuf Abdullahi.

Ya ce lamarin ya farune a ranar Asabar 3 ga Maris da muke ciki , yana mai cewa lokacin da jami’an su suka isa wurin sun iske gawar matasa biyar a ramin da iftila’in ya rutsa da su.

Cikin wadanda lamarin ya shafa sun hada da Alasan Abdulhamid mai shekaru 22 da Muhammad Sulaiman mai shekaru 35 da Dauda Nasir dan shekara 25

Sauran sune Jibrin Musa mai shekaru 30 da kuma Jafaru Abdulwahabu mai shekaru 30.

Jami’in hulda da jama’a na hukumar SFS Saminu Yusuf Abdullahi ya kuma ce tuni hukumar ta mika Mamata ga dagacin garin na ‘yan Lami domin yi musu jana’iza kamar yadda addinin musulnci ya ta nada.