Mutane 24 sun rasa rayukan su sakamakon cin guba a abinci a Sokoto

Gwamnatin jihar Sokoto ta tabbatar da mutuwar wasu iyalai 24 sakamakon cin abinci mai guba.

Kwamishinan lafiya Dr Ali Inname ne ya tabbatar da hakan, yana mai cewa lamarin ya faru a ƙauyen Bargaja da ke ƙaramar hukumar Isa a jihar Sokoto.

Kwamishin ya ce, iyalan sun ci wani sinadarin guba da ake kiran sa Gishirin Lalle, wanda suka yi amfani da shi a matsayin gishiri a abinci.

Dr Ali Inname ya ce, dukkanin iyalan da suka ci gubar sun rasa rayukan su, yayin da wasu biyu a ciki suka tsallake rijiya da baya sai dai suma suna karbar kulawar likitoci.