JAMB ta musanta jita-jitar sake yiwa wasu dalibai jarabawa

Hukumar Shirya jarabawa shiga manyan makarantu, JAMB, ta ce ba zata sake yin wata jarabawa ga kowane rukuni na daliban da suka rubuta jabarawar ta bana ba kamar yadda ake yada jita-jita.

Shugaban sashen yada labaran hukumar, Dr Fabian Benjamin, ne ya bayyana hakan ga manema labarai yau Laraba 30 ga watan Yuni a jihar Lagos.

Dr Benjamin, ya ce, akwai jita-jita dake cewa JAMB ta tsayar da ranar 3 ga watan Yuli don sake yin jarabawa ga daliban da suka samu kasa da maki 170 a jarabawar ta bana.

“Tuni muka saki sakamakon jarabawar dukkanin dalibai, waɗanda suka zauna jarabawar ta 2021,” in ji Benjamin.