Jami’an Civil Defence sun cafke mutumin da ake zargi da satar kayayyakin makaranta

Hukumar tsaron ta Civil Defence a jihar Jigawa, ta kama wani mutum da ake zargi da satar kayayyaki a wata makarantar sakandare da ke ƙaramar hukumar Dutse.

Mai magana da yawun hukumar a jihar, ASC Badruddeen Tijjani Muhamud, ne ya bayyana hakan cikin wani saƙo da ya aikowa Freedom Radio. 

Ya ce jami’an hukumar sun samu nasarar cafke wanda ake zargin ne bayan samun bayanan sirri da kuma gudanar da sintiri a yankin.

ASC Badruddeen Tijjani Muhamud ya ƙara da cewa hukumar za ta ci gaba da gudanar da cikakken bincike kan lamarin, kuma da zarar an kammala binciken za a gurfanar da wanda ake zargin a gaban kotu domin fuskantar hukunci.