Jami’an lafiya 141 ne suka kamu da Covid-19 a Kaduna

Kwamitin yakin da cutar Corona na jihar Kaduna ya ce, ma’aikatan lafiya dari da Arba’in da daya ne suka kamu cutar Corona, tun daga watan Afrilu zuwa wata da muke ciki na Yuli.

Shugaban kwamitin Dr. Neyu Illiyasu ne ya tabbatar da hakan yayin zantawa da manema labarai a can Jihar ta Kaduna.

A cewar sa, lokaci ya yi da hukumomin lafiyar jihar, za su kara kaimi wajen ganin sun kare lafiyar ma’akatar jihar daga kamuwa ko yada cutar a tsakanin su.

Dr Neyu Illiyasu ya kuma ce, daga cikin wadanda suka kamu da cutar an samu ma’aikaci lafiya daya da ya rasa ransa sakamakon cutar, inda wadanda ke dauke da cutar a fadin Jihar sun kai kimanin dubu daya da goma sha shida.