Kamfanin NNPC yace batun daukar ma’aikata da ake yadawa ba gaskiya bane

Kamfanin Man Fetur na Kasa NNPC ya bukaci jama’a su yi watsi da labaran da ke yawo a kafafen sada zumunta cewa kamfanin yana daukar ma’aikata.

Kamfanin ya bayyana hakan ne a cikin wata sanarwa da ya fitar ranar Lahadi mai dauke da sa hannun mai magana da yawun sa, Garba Deen Muhammad, a Abuja.

Sanarwar ta kara da cewa duk lokacin da kamfanin ya yanke shawarar daukar ma’aikata, zai sanar da hakan ga jama’a ta ingantattun hanyoyin yada labarai, da kuma shafin kamfanin na NNPC wato www.nnpcgroup.com.