Rundunar ‘Yan-sandan Zamfara ta kama ‘Yan leƙen asiri 48 a watan Satumba

Rundunar ‘yan sandan jihar Zamfara ta samu nasarar kama mutane 21 da ake zargin ‘yan-bindiga ne tare da ‘yan liken asiri 48 a watan Satumbar da ya gabata.

Mai magana da yawun rundunar SP Muhammed Shehu, ne ya bayyana hakan a wani taron manema labarai da ya gudana ranar lahadi a Gusau, kan nasarorin da rundunar ta samu a wata guda.

Yace ‘yan bindiga 5 da sunayensu ke jerin wadanda ake nema ruwa a jallo sun mutu yayin wani sumame da rundunra ta kai.

Kazalika ya yi kira ga mazauna yankin da su yi hakuri tare da bai wa hukumomin tsaro goyon bayan da ake bukata don kawar da duk masu aikata laifuka da dawo da doka da oda.