KASSOSA za ta gudanar da taron ta shekara a jihar Jigawa

Kungiyar tsoffin daliban Kwalejojin Kimiyya ta jihar Kano KASSOSA ta shirya gudanar da taron ta na shekara a jihar Jigawa ba kamar yadda aka saba gudanarwa a jihar Kano.

A cewar kungiyar an kai taron jihar Jigawa ne domin baiwa ‘ya’yanta na jihar damar halartar taron.

Sakataren kungiyar na kasa Alhaji Hassan Abdulhamid Hassan ne ya bayyana hakan cikin wata tattaunawa da yayi da wakilinmu Umar Idris Shuaibu a wani bangare na shirye shiryen taron na shekarar 2019.

Alhaji Hassan Abdulhamid Hassan ya bayyana cewa za a gudanar da taron ne a ranar 25 ga watan Disamba a cibiyar Manpower Development dake garin Dutsen Jihar Jigawa.

Wakilinmu Umar Idris Shuaibu cewa an shirya gabatar da mukaloli da dama a bangarori daban-daban na rayuwa.