Kotu : Ana zargin wani mutum da yin damfarar daloli a Kano

Kotun majistiri dake zamanta a Gyadi Gyadi karkashin mai sharia Auwal Yusuf ta dage sauraron karar Malam Lurwanu Tasiu wanda ake zargi da damfarar wani kusan naira miliyan uku da zummar zai bashi Daloli da kuma laifin yi masa barazana.

Tun da farko sun kulla mu’amalar kudi ne a tsakaninsu cewa Lurwanu zai bashi Daloli shi kuma zai bashi kudin Najeriya miliyan uku, inda ya bukaci daya kai masa kudin karkashin wata bishiya dake cikin wani kungurmin Daji bayan yakai sai ya zagaye ya debe kudin.

A zaman kotun na yau bayan kotu ta karantowa wanda ake zargi wato Lurwanu laifukan da ake tuhumar sa dasu ya musanta, sai dai lauyansa Barista Hamza Sani Bawa ya bukaci kotu data cigaba da barin Malam Lurwanu a hannun beli.

Munyi kokarin jin tabakin lauyan masu kara domin jin hanzarin su amma sunki cewa komai dan gane da zaman kotun na yau.

Wakilin mu na Kotu da ‘yan sanda Abdulkarim Muhammad Tukuntawa ya ruwaito mai sharia Auwal Yusuf Sulaiman ya dage cigaba da sauraron karar zuwa ranar biyar ga watan janairu mai kamawa domin cigaba da sauraron shariar.