Kotu ta dage sauraran karar matar da ake zargi da yanka danta a Kano

Babbar kotun jihar Kano dake zaman ta a Miller Road karkashin jagorancin mai sharia Ibrahim Musa Karaye, ta dage ci gaba da sauraran shariar da ake yi ga matar nan da ake zargi da yanka danta, har zuwa ranar hudu ga watan gobe na Oktoba.

Matar da ake zargi da aikata laifin mai suna Saratu Ya’u mazauniyar garin Sabon birni a yankin karamar hukumar Gwarzo, tun a ranar 12 ga watan Yunin shekarar dubu biyu da goma sha takwas aka gurfanar da ita gaban kotun ana tuhumar-ta da laifin yanka danta mai suna Buhari Abubakar mai shekaru biyar.

Lauyan gwamnati Barista Lamido Abba Soron Dinki ya nemi izinin kotu domin a karanta mata laifin da ake zarginta da aikatawa, wanda ba tare da bata lokaci ba ta amince da aikata laifin yanka yaron nata.

Wakilin mu na kotu Bashir Muhammad Inuwa ya ruwaito cewa, lauyan ya nemi izinin kotu da akaita asibiti domin likita ya duba kwakwalwarta.