Kotun daukaka kara a Kano ta jingine hukuncin nasarar da Jibrin Ismail Falgore ya yi

Kotun daukaka kara dake zamanta a nan Kano ta jingine hukuncin da kotun sauraron karar zabe ta yi ranar 24 ga watan Yulin da ya gabata da ta yanke hukuncin cewa Jibrin Ismail Falgore ne ya yi nasara a zaben majalisar dokokin Jihar Kano mai wakiltar karamar hukumar Rogo.

Da yake yanke hukuncin mai shari’a Abubakar Datti Yahaya wanda ya jagoranci alkalan kotun daukaka kara, ya baiwa daya daga cikin alkalan kotun damar karanta hukuncin, inda mai sharia H. A. O Abiru ya bayyana cewa lauyan dan takarar jam’iyyar PDP Barista Ibrahim Garba Waru ya gaza gamsar da kotu da kwararan hujjoji masu inganci a bisa rashin barin aiki kafin shiga takara.

A saboda haka ya zuwa yanzu dan takarar jam’iyyar APC Magaji Dahiru Zarewa ne a matsayin mai wakiltar karamar hukumar Rogo a majalisar dokokin jihar Kano.

Wakilinmu Bashir Muhammad Inuwa ya yi kokarin jin ta bakin lauyan PDP da ya wakilci Jibrin Ismail Falgore, amma bai ce komai ba.