Ku kara hazaka wajen kakkabe ‘yan ta’adda daga Najeriya – Buhari ga jami’an tsaro

Shugaban kasa Muhammadu Buhari ya bukaci jami’an tsaron kasar nan da su kara kokari wajen kawo karshen matsalar rashin tsaro da ke addabar kasar nan.

Shugaban kasar ya kuma yi allawadai da kisan gillar da ‘yan bindiga su ka yi ga wasu jama’a a jihar Zamfara, yana mai cewa gwamnatinsa tana iya kokarinta wajen ganin ta kawo karshen zubar da jinin al’umma a fadin kasar nan baki daya.

A cikin wata sanarwa mai dauke da sa hannun babban mataimaki na musamman ga shugaban kasa kan harkokin yada labarai, Malam Garba Shehu, ta ce, zubar da jinin al’umma musamman a wannan lokaci na azumi rashin imani ne kuma abin tir.

Ya kuma sha alwshin cewa jami’an tsaro za su zakulo wadanda ke da hannu wajen zubar da jinin jama’a don girbar abin da suka shuka.