Kungiyar dattawan arewa NEF ta zargi shugaba Muhammadu Buhari da sanyin jiki

Mai magana da yawun kungiyar Hakeem Baba-Ahmed ne ya yi wannan zargi a wata tattaunawa da gidan talabijin na Arise, inda ya ce sanyin jikin da Buhari yake nunawa kan sauke nauyin da ya rataya a wuyansa ya yi yawa.

“Ina mamakin yadda Buhari ya gaza magance matsalolin tsaron Najeriya, kalli yadda sace-sacen mutane ana garkuwa da su sauran ayyukan ‘yan bindiga suka addabi al’umma, wanda a baya can babu wannan matsala” in ji Hakeem Baba-Ahmed.

“Idan na samu damar magana da shugaba Buhari, zan ce ma sa yallabai ka yunkura mana, kasar nan fa tana cikin hatsarin rugujewa a cikin mulkinka, alhalin ka yi rantsuwar kare rayuka da dukiyoyin al’ummar kasa a lokacin yakin neman zaben shekarar 2015 da kuma 2019” a cewar Hakeema Baba-Ahmed.