Gwamnonin Arewa sun bukaci hadin kan al’umma wajen kawo karshen matsalar tsaro a Najeriya

Kungiyar gwamnonin Arewacin kasar nan ta bukaci al’ummar Najeriya dake sassa daban-daban a kasar, dama Duniya, da su kara bada hadin kai wajen kawo karshen matsalar tsaro dake addabar Najeriya.

Shugaban kungiyar gwamnonin kuma gwamnan jihar Filato Simon Bako Lalong ne ya bayyana hakan a sakon bikin Easter, a madadin kungiyar.

Lalong ya kuma bukaci al’ummar kiristoci da su ci gaba da gudanar da addu’o’i domin samun zaman lafiya da hadin kai da kuma ci gaban kasar nan.

Ya kuma bukaci ‘yan Nijeriya kan su ajiye banbancin addini da al’ada da kuma siyasa, tare da tsayawa waje daya domin tabbatar da samnun zaman lafiya da kwanciyar hankali mai dorewa.