Kungiyar likitoci masu neman kwarewa ta tsunduma yajin aiki

Kungiyar likitoci masu neman kwarewa ta kasa ta tsunduma yajin aikin sai baba ta gani a sakamakon rashin biyan mambobinta wasu hakkkokinsu tun daga shekarar 2016 zuwa bana.

Shugaban kungiyar reshen Jihar Kano, Dakta Abubakar Nagoma Usman ne ya bayyana haka, a yayin taron manema labarai da kungiyar ta gudanar a yau domin shaidawa al’umma halin da ake ciki game da yajin aikin.

Dakta Abubakar Nagoma ya ce akwai kudaden albashi da na alawus-alawus da kungiyar ke bin gwamnati, wanda har yanzu ba su san matsayinsu a kan lamarin ba.

Dakta Abubakar Nagoma ya kuma ce gwamnatin tarayya na korar mambobinta daga aiki, duk da cewa sun sadaukar da rayuwarsu tun bayan barkewar annobar cutar Covid-19.

Ya kara da cewa kungiyar ta ware wasu wurare domin duba marasa lafiya da ke bukatar kulawar gaggawa.