Kwastam – ta yi wawan kamu na fiye da miliyan 70

Hukumar hana fasa kwauri ta kasa kwastam mai kula da shiyyar Kano da Jigawa ta kama kayayyakin da aka yi fasa kwaurin su da kudin su ya tasamma fiye da Naira milyan saba’in da tara.

Hukumar ta bayyana hakan ne yayin wani taron manema labarai da kwanturolan hukumar Nasiru Ahmad ya gudanar a shalkwatar hukumar anan Kano.

A cewar sa, hukumar ta kama kayan yayin rangadin da ta gudanar, inda ta kama shinkafa ‘yar waje da takin zamani da kuma tabar wiwi da kuma mutanen dake da alaka da kayan.

Nasiru Ahmad ya kara da cewa bata garin na amfani da yankin garin Babura don shigo da kayayyakin da ake fasa kwaurin su.

Ya kuma bukaci shugabannin bangaren da suyi dukkan mai yiwuwa don ganin an kawo karshen wannan matsala, da kuma tallafawa hukumar wajen kawo karshen ayyukan bata gari.