Majalisa ta nemi Buhari ya mayar da Nasir Argungu kan mukamin sa

Majalisar wakilai ta bukaci shugaban kasa Muhammadu Buhari da ya gaggauta mayar da Nasir Argungu akan mukaminsa na shugabancin hukumar samar da aikin yi ta kasa NDE.

‘Yan majalisar sun yi wannan kiran ne a yau talata, bayan da dan majalisa Olajide Olatunbosun mai wakiltar mazabar Atisbo/Saki East/Saki a jihar Oyo ya gabatar da bukatar hakan.

Tun farko dai mamban ya gabatar da kudirin ne game da guraben aiki na wucin gadi na gwamnatin tarayya guda dari bakwai da saba’in da hudu, wanda majalisar ta samu sabani da karamin ministan kwadago da samar da aikin yi, Festus Keyamo.

‘Yan majalisar dai sun soki matakin da shugaban kasa ya dauka na korar shugaban hukumar ta NDE daga mukaminsa.