Majalisar Kano ta amince da nadin karin wasu kwamiahinoni uku

Majalisar dokoki a jihar Kano, ta amince wa gwamna Engr. Abba Kabir Yusuf, damar ƙara naɗa sababbin Kwamishinoni uku.

Amincewar na zuwa ne a Wani zama na musamman da majalisar ta gudanar a yau Alhamis bayan da shugaban majalisar Jibril Isma’il Falgore ya karanta wasiƙar da gwamna ya aike mata domin neman sahalewar.

Bayan karanta wasiƙar ne ɗaukacin mambobin majalisar suka amince da karawar mutanen, tare da umartarsu da su halarci zaure majalisar da misalin ƙarfe 1:00 na ranar yau Alhamis domin tantance ce su.

Sababbin kwamishinonin sun haɗa da: Alhaji Ibrahim Jibrin daga ƙaramar hukumar Fagge, sai Ibrahim Ali Namadi daga Dala, da kuma Hajiya Amina Abdullahi daga ƙaramar hukumar Nassarawa.

Freedom Radio ta ruwaito cewa a zaman na yau, shugaban majalisar ya kuma karanta wasiƙar da gwamnan ya buƙata na a tantance Mai shari’a Dije Abdu Aboki domin naɗa ta a matsayin babbar jojin a jihar Kano.

Rahoton: Auwal Hassan Fagge