Majalisar Kano ta sanya ranar tantance sabbin Kwamishinoni

Majalisar dokokin jihar Kano ta sanya ranar 2 ga watan gobe na Afrilu domin tantance wadanda gwamnan ya tura sunayensu domin naɗa su a matsayin Kwamishinoni kuma wakilai a majalisar zartaswar jiha.

Majalisar ta bayyana hakan ne a zamanta na yau Talata bayan da ta karbir wasikar bukatar hakan daga Gwamna Injiniya Abba Kabir Yusuf.

Ta cikin wasikar, gwamnan ya aika wa majalisar sunayen mutane 4 da ya bukaci ta tantance su tare da nada su a matsayin kwamishinoni kuma wakilai a majalisar zartaswa.

Mutanen da gwamnan ya tura da sunansu sun hada da Adamu Aliyu Kibiya da Usman Shehu Aliyu da Abduljabbar Umar Garko da kuma Babban dan tsohon gwamnan Kano Sanata Rabi’u Musa Kwankwaso watau Mustapha Rabi’u Musa.